ميت فارس _ صلاح رزق
ميت فارس
بقلمي صلاح رزق
صوت السكون فى حُضن التوتَه والضِله
وريحة الطمي ولون الخُضره والغله
يرُد الروح لروح تايها فى أحزانها
وأوجاعها. تدوب وتطيب
بِشَربِة ميه م القُلَّه
ونسمة ريح وصوت البلبل الدافي
فى ضي النور بقلبه الطيب الصافي
وضِحك الميه للساقيه
بِفَرحَه وهي شَيْلاها
توشوشها وترميها
فى حِجر النبته والزرعه
ويتغير بنا المشهد
ونسرح فى الفضا الواسع
وصوت م القلب بتوَجَّع
يرجعنا لِأحزنا
لدنيتنا اللي نعرفها
ببلاويها وأحداثها
يثور المنظر الواضح
ويستهزئ بإحساسنا
كأن الحزن دا فاضح
وداء يحصُد فى أرواحنا
وحاول ارجَّع المشهد
وامسك تاني فى المنظر
وحارب كل أوهامي
وأوجاعي وأحزاني
وخوفي يقولي ما هتقدر
ويجي المشهد الأول
يحوَّطني بميت حارس
وأصرخ فيها تسمعني
أنا الفارس
ومن صوتي بتتبعني
وكل ما فيا يندهني
بسيطه الدنيا أهي خالص
يمر الليل على فرسُه
مُهاب وعظيم
كأنه بجد م الهيبه
من السلاطين
يدور حواليه قمر صاحي
فى إيده النور
بيضحك للنجوم تضوي
فى وسط سماها فرحانه
على مواله تتمايل
وم الفرحه تلف تدور
بطمنا وفرحنا
ويسعد لينا افراحنا
ولو زاد المرار فينا
نسافر له بأرواحنا
ولما نتوه فى ايامنا
بنتخبى فى أنواره
كأنه الصاحب الحارس
بسيطة الدنيا أهي خالص
ومليانه حياة بتفور
بشمس شروقها وغروبها
حكايه من عيون الحور
جميله وحلوه تتدلع
بنظره ورقه ومشاعر
وتتمنع ع خُطابها
وتضحك لما يغازلها
كلام الحب من شاعر
يلخبطها بأوصافه
وبالكلمه اللي بغزلها
بروح الحرف والمعنى
ويعلنها لعزاله
لو الدنيا دي ميت فرسه
أنا روحي بميت فارس
بسيطه الدنيا أهي خالص
و مليانه حياة بتفور
ميت فارس
بقلمي صلاح رزق
اضف تعليقاً عبر:
الابتسامات