ظل _ نشأت البسيوني

 

ظل

بقلم/نشأت البسيوني

في لحظات كتير بحس ان في ظل ماشي ورايا مش ظل جسمي لكن ظل لنسخه مني كنت عايش بيها زمان وافتكرت اني سبتها ورايا لكنها ترجع تظهر كل ما الدنيا تهدا وتحاول تفتّح باب كنت قافله من زمان وكل ما افتكرها احس اني بين نسختين واحده عايشه دلوقتي والتانيه بتشدني لورا وبتسألني ليه اتغيرت

الظل ده ساعات يكون اقوى من الحقيقه وساعات يكون اضعف

لكنه دايما موجود يراقب ويتساءل ويحاول يفكرني بالحاجات اللي طنشتها وبالقرارات اللي هربت منها وبالاحلام اللي ما كملتش فيها الطريق ويمكن يكون وجوده مش خوف قد ما هو رساله تقول لي ما تنساش مين كنت وما تنكرش مين بقيت يمكن الظل ده بيعلمني ان الانسان مش صفحة جديدة دايما الانسان كتاب كامل مليان فصول قديمه وجديده ومهما حاول يمسح الماضي يبقى في علامة

خفيفة تشهد انه مر من هنا وانه اتوجع هنا وانه ضحك هناك وانه خسر وتعلم في نفس المكان اللي تعب فيه وساعات الظل يكون أحن من اللي حوالينا يحضنك من بعيد من غير ما يقول كلمة ويديك احساس انك مش لوحدك حتى لو ماحدش فاهمك ومهما اتغير شكلك وطريقة كلامك وطموحاتك يفضل الظل ثابت ما يعرفش يخونك ولا يعرف يسيبك ولا يعرف يبيعك زي ما البشر

ممكن يعملوا ومع الوقت تفهم ان وجود الظل مش لعنه ولا ثقل وجوده مجرد علامة انك حي وانك بتتطور وانك مش نفس الشخص اللي كنت عليه امبارح وانك لسه قادر تتغير وكل ما تمشي خطوة لقدام يتحرك هو معاك خطوة يوازنك يحميك يذكرك ويقول لك من غير كلام خليك ماشي